تجربتي في امتحان فرست الباطنة الزمالة المصرية

تجربتي في امتحان فرست الباطنة الزمالة المصرية

الاستعداد امتحان الزمالة المصرية الباطنة

سلام عليكم

ازيكم يا دكاتره


انا هتكلم عن تجربتي في الامتحان

امتحان فرست الباطنة


## بالنسبة لنظام الامتحان

---------------

نظام الامتحان معروف

وهو ورقتين

كل ورق منهم مدتها ساعتين

الورقة الاولي عبارة عن : 100 سؤال MCQ

وبتخلصها وتاخد بريك

وبعدين تدخل الورقه التانيه

اللي هي عباره عن cases .. ٥ حالات

واسئلة شورت نوتس


طريقة المذاكره والاستعداد للامتحان

-------------------

انا في الأول قولت اذاكر من كتاب

Step up to mrcp بتاع د خالد المغربي

الكتاب عباره عن نوتس مجمعها من الاجابات بتاع أسئلة ال mcq في الكتب المشهورة ورتبها في شكل موضوع

فابقي كده كأني حليت كذا كتاب mcq يعني


 الكتاب الحقيقه كويس وبيفيد علميا جدا وأسلوبه كويس برضو

 ‎بس بصراحه كبير اووي وفي الاخر تحس انك مش ضامن ورقة اولي ولا تانيه

 ‎انا ذاكرت منه اغلب الشباتر وابقي كداب لو قولت ما فادنيش


وفضلت اذاكر منه لغايه قبل الامتحان بشهر

خلصت تقريبا كل الشباتر منه ماعدا النيورو والانفيكشن والهيماتولوجي


وقبل الامتحان بشهرتقريبا  شفت ملف ال curriculum اللي هو علينا في امتحان الفرست

وكانت صدمه الصراحه

انا كنت قاعد بذاكر حاجات مش علينا اصلا ಠ_ಠ

مش علينا في الورقه التانيه يعني اقصد


فالطريقة اللي ممكن انصحكم تذاكروا بيها هي


بالنسبة للورقة التانية

اللي هي في ايدينا نظبطها ومواضيعها محدده وممكن تتلم ان شاء الله

-----------------

مثلا في شابتر زي ال chest

#اول_حاجه

طلع الكوريكلم وشوف ايه اللي علينا

هتلاقي المطلوب

ASTHMA

COPD

CHEST INFECTION

وشويه ال emergencies " اللي هو مهمين بالمناسبة"

ذاكرهم من اي مصدر نظري بتحبه

يكون حاجه مختصره ومغطيه النقط المكتوبة في الكوريكلم

 او علي الاقل تكون مغطيه النقط المهمة زي مثلا Causes , Diagnosis , Treatment , Complications


مثلا انا كنت بقرأ من كتاب اسمه mohamed inam danish

وشويه حاجات قريتها من موافي


في ناس تانيه كانت بتذاكر من كتاب اسمه

Step up to medicine


وناس كانت بتذاكر من كتب اسامه محمود

انت شوف مصدر بترتاحله وأقرأ منه

والمصادر دي هتلاقوها علي جروب زمالة الباطنة العامة سواء علي الفيس او علي تليجرام


#تاني_حاجه

تجيب كتاب القصر العيني problem solving

وتحل الحالات بتاع الشيست

هتلاقيها بتتحل بسهوله أن شاء الله بعد ما قريت الموضوع نظري


وممكن بعدها تفتح مذكره شورت نوتس زي الغزالة او ملزمة الشورت نوتس 

وتشوف الشورت نوتس اللي مكتوبه في الشيست

هتلاقيها غالبا نفس الكلام اللي قريته فيه النظري


وهكذا في كل الشباتر

كده انا شايف انك تبقي ظبطت الورقة التانيه كويس


انا عملت كده والورقه التانيه بالنسبه لي كانت كويسه الحمدلله


حابب تحل كتب problem solving زياده

 مفيش مشكله في ناس عملت كده وبتقول أن حالات الامتحان بتاعنا جات منها

وانا رفعت كتاب case files علي الجروب


هي الفكره بس انك بعد مذاكره النظري بتكون كل اللي محتاجه من ال case هو السيناريو بتاعها

بتحلها كأنها سؤال mcq عادي يعني

لكن اسئلة النظري اللي علي الحاله

المفروض  انت مذاكرها من المصدر بتاعك بقي

مش كل مرة تحفظ اجابة نفس السؤال من مصدر مختلف يعني ! كده هتبقي بتضيع وقتك علي الفاضي

ده بالنسبه الورقه التانيه ...


بالنسبة للورقة الأولي MCQ

---------------------------

١٠٠ سؤال في ساعتين

الوضع صعب الصراحه

وبنطلع من الامتحان مش عارفين

⚆ _ ⚆

مش عارفين بجد !!

يعني الطبيعي انك تطلع من الامتحان عارف انك حالل حلو او وحش

ده بتطلع منه مش عارف ومش شايف اصلا ◉_◉


الوقت ضيق جدا في الامتحان

ولازم تتدرب علي حل اسئلة mcq كتير

حل علي اد ما تقدر

كتاب القصر العيني

Pretest

Lange

اي كتااااب ايدك تقع عليه بقي وعندك وقت اقراها

احنا الامتحان بتاعنا انا معرفش هو كان جاي منين

في ناس بتقول هاريسون ؟!

انا مكنتش اعرف ان في كتاب اسمه هاريسون اصلا ممكن نقرأه لل mcq !


بس انا نصيحتي وانت بتحل mcq

هات كشكول جنبك

وكل سؤال تحله خد منه note

يعني مثلا

السؤال ده انا حليته

 واللي استفدته منه أن لما يجي حاله فيها

irregular pulse + mid diastolic murmur

Not propagated to axilla 

تبقي دي MS


او سؤال جالك فيه

tall healthy young male +  pneumothorax

تبقي دي rupture subpleural pleb

مثلا يعني

اكتبها في سطر او اتنين

حابب تزود في الكلام أو تختصر براحتك

بحيث انك لما تيجي تراجع لو مفيش وقت عندك

تقرأ النوتس دي تفتكر الفكره بتاع السؤال كانت ايه


** في ناس كانت نظام مذاكرتها مختلف عن النظام ده

كانوا بيحلوا MCQ بس

وبيعتمدوا علي المعلومات اللي بيطلعوها من الاسئلة زائد معرفتهم  بالمواضيع المشهورة من الشغل

يمكن نفعت معاهم في المرة اللي كان فيها الامتحان جاي من كتاب القصر العيني ولما خرج عنه جاب من pretest

بس انا شايف انها مخاطرة بصراحه

ولو هنستفيد حاجه من تجربتهم هي .. هي ان حل ال MCQ كتير مهم جدا


وفي حاجات مهمه بتيجي في كل امتحان تقريبا ولازم تكون عارفها وحاول تتدرب عليها

زي مثلا

CT brain

 ويقولك انت شايف ايه

غالبا بتكون stroke

infraction or hemorrhage

ويسأل علي ال artery اللي مضروب

واللي غالبا بيكون MCA

وممكن يسألك ننزل الضغط ولا لا؟



يجيبلك ECG 

او اتنين ECG كمان فيهم MI

ويقولك ايه ال branch اللي فيه مشكله

فلازم تكون حافظ branches of coronary ولما ايه بيتسد بيعمل ايه

وممكن يسألك تحب نعمله ايه او نديله ايه ؟

وممكن رسم القلب يجيلك فيه Hyperkalemia

واحنا اصلا جالنا حالة في الامتحان Hyperkalemia

التشخيص بتاع الحالة كان معتمد علي ال ECG

فحاولوا تظبطوه


بييجي ABG 

وبيقولك ده ايه او جزء من حاله مزيد مثلا DKA فاعرف ABG


دي مهارات بسيطة كلنا عارفينها تقريبا وبتجمع درجات في الامتحان ماتقلقوش

وبيكون في ملف فيه صور جاي مع ورقة ال MCQ 

بيساعدك في الحل علي فكرة

وفي ملفات للصور اللي ممكن تيجي هرفعها ان شاء الله


حاجه اخيرة حابب اقولها

الامتحان مش صعب ومش سهل

لازم تذاكروا وتعملوا اللي عليكم علشان ربنا يوفقكم

والمذاكرة لامتحان الفرست بالطريقة دي هتخليكم احسن كتير علميا ان شاء الله

وهتحسوا بفرق كبير :)

اعملوا جدول كده وابدأوا من دلوقتي لأن رمضان جاي وكاس العالم جاي وربنا يسترها معاكم ツツ

واللي مخلصش التويفل وال ICDL ينجز ويخلصهم


ده اللي في بالي دلوقتي

ولو في حاجه مش واضحه قولوا

ولو افتكرت حاجه تانيه هقوللها أن شاء الله

وياريت الناس اللي دخلت لو عندها ملاحظه او حاجه تقول تجربتها تتفضل


وربنا يوفقكم ❤ ヅ


-----------

لو حابب تنضم لجروب زمالة الباطنة العامة علي تليجرام

اضغط هنا وابعتلنا رسالة

https://t.me/Egyfellowship




ردود الاعضاء
لو في حاجه حابب تضيفها ممكن تكتبها هنا
لاضافة رد يجب تسجيل الدخول اولا

شارك الصفحة علي الفيس بوك

كتب الموضوع
اسئلة الزوار

احنا محتاجين مشرفين من جميع التخصصات ياريت لو حابب تساعد تبعتلنا رسالة علي الصفحه هنا

انضم لفريق العمل