امتحان الجزء الأول من الزمالة المصرية للطب النفسي

امتحان الجزء الأول من الزمالة المصرية للطب النفسي

امتحان الجزء الأول من الزمالة المصرية للطب النفسي

 الجزء الأول يعتبر أهم جزء في زمالة الطب النفسي واللي بيعديه الامور بتكون اسهل كتير بعد كده 


وده لعدة اسباب اولها انك لسه جديد ومتعودتش على النظام ده في الامتحانات واللي هو نظام قريب من الزماله البريطانيه من حيث النجاح او الرسوب وكمان السورسات اللي بنذاكر منها والكوريكوليم المطلوب مذاكرته لكنه يمتاز رغم صعوبته انه mcq مفيهوش عيوب أسئلة المقال والحفظ والدش الكتير والتقييم من المصحح بتاع زمان لان كمان التصحيح الكتروني فبتاخد حقك وغالبا مش بتتظلم .. 


مهم جدا جدا جدا جدا حضور محاضرة أ.د أحمد عكاشه قبل الامتحان واللي بيقول فيها نظام الامتحان وحضور الكورس اللي بيتعمل من الزماله قبل الامتحان ..


هنذاكر منين

نيجي بأه لحتة هنذاكر منين وازاي والوقت الكافي للمذاكره قد ايه والحاجات الجميله دي ? 

اولا كل ما تبدأ بدري كل ما يكون أفضل ولكن اجمالا شهرين مذاكره كويسه كافي انك تلم الدنيا ..

الكوريكولم او البرانشات اللي فيها الجزء الاول كتير شويه للأسف وفيها أجزاء صعبه هتاخد منك وقت وملهاش سورسات كتير فلازم تعمل حسابها كويس جدا .

انت بتمتحن psychology وده جزء كبير من الاسئله بكل محتوياته وداخل معاه ال social وال cultural  و جزء neuroscience وده جزء صعب شويه محتاج تركيز كويس وكبير داخل معاه أجزاء كتير و جزء psychopharmacology بكل محتوياتها وبييجي منها كتير ومحتاجه تأكيد على الاجزاء ال clinical وبتغلبط فمحتاجه فهم وتركيز  و جزء psychopathology حلو ولذيذ  و جزء Genetics صعبه ومحتاجه حفظ وبييجي منها كتير على فكره متهملهاش و جزء statistics محتاجه تتفهم كويس هتسهل الدنيا كتير و أجزاء صغيره شويه زي rating scales و history of psychiatry و ethics and philosophy of psychiatry بييجي منهم جمل بسيطه .. 


الامتحان ملوش نظام ثابت في توزيع الاسئله على البرانشات لكن التركيز كتير السنوات اللي فاتت على incedince and prevalence والحاجات الكلينيكال أكتر وده شيء جيد ووحش في نفس الوقت جيد انه ده المهم فعلا ووحش ان السورسات اللي بتتكلم بالطريقه دي قليله .. 


 نيجي للمهم هتذاكر ازاي

 نصيحتي انك محتاج في البدايه انك تكون base كويس بمذاكرة نظري على الأقل شهر قراءه فقط وفهم بدون حفظ
وتلم معلومات من كتب النظري الموجوده مع اغلب الناس اسأل عنها كويس ده بالنسبه للنظري اقرأه مره واحد متحفظش وافهم وبس ..


 وبعد كده الجزء الأهم وهو حل ال MCQ فده ليه سورسات كتييييره اسأل عنها كويس الناس اللي قبلك ..  وحل كتيييييييير وخليك دايما updated بكل جديد 



كده بشكل كبير تكون جاهز للامتحان


 اللي بيكون في مقر الزماله وبيكون مقسم على ورقتين كل ورقه ١٠٠ MCQ مدتها ساعتين
 بتاخد ورقه اسئله وورقه تظلل فيها الاجابات بتاعتك بالرصاص علشان التصحيح الكتروني وفاصل بينهم ساعه راحه
 والوقت كافي للحل لكن طبعا لازم تقسم وقتك كويس والا الوقت هيسرقك ..

 في امتحان السكند اللي فات نزل قرار انك لازم تنجح في كل ورقه لوحدها علشان تنجح وتعدي يعني مينفعش الورقتين يسندوا بعض
ولسه محدش عارف ده هيتطبق على الفرست اللي جاي ولا لأ ..

 والبرانشات مش متقسمه على الورقتين لا مش معروف تقسيمه واضحه برانشات ايه في كل ورقه وانت ونصيبك ? 

أظن كده اكون غطيت النقط المهمه عن نظام امتحان فرست الزماله المصريه للطب النفسي وبالتوفيق والنجاح ان شاء الله ..


كتب الموضوع : د احمد حمدين العوضي

معلومات اكتر عن تخصص الطب النفسي في الزمالة المصرية

المستشفيات المتاحة للطب النفسي في الزمالة المصرية


ردود الاعضاء
لو في حاجه حابب تضيفها ممكن تكتبها هنا
لاضافة رد يجب تسجيل الدخول اولا

شارك الصفحة علي الفيس بوك

اسئلة الزوار

احنا محتاجين مشرفين من جميع التخصصات ياريت لو حابب تساعد تبعتلنا رسالة علي الصفحه هنا

انضم لفريق العمل